أساسيات المكياج الجزء الثاني

يسعد اوقاتكم يارب ()

وصلنا للي بعد الفاونديشن .. وبالنسبه لي هو

الكوريكتور / المصحح اللوني { additional }

هذا شي حديثا بدا يظهر والناس بدت تعرفه .. وهو مايعرف بالكوريكتور او المصحح .. اللي البنات يعانو من هالاتهم لأنهم مايعرفوه

شخصيا عرفت عنه من موظف بماك قبل لما كانو رجال ( فيس حاقد 😒 ) كنا نشتري كونسيلر واشتكينا انه رمادي

قال لأنك ماتحطين مصحح قبله .. عالعجله اللونيه الاحمر ( المشمي والاورانج ولون السالمون  ) يقابل الاخضر (اللي هو اندرتون السواد - شرح مختصر معليش ) .. وبالمصححات دايما ناخذ عكس المشكله اللون المقابل للمشكله عالعجله اللونيه .. فللهالات الغامقه يفضل نستعمل مصحح لونه مشمشي قبل الكونسيلر .. وتلاحظوا المصححات لها الوان .. اخضر وبنفسجي وغيره .. ما حاستفيض فيها حاليا بس مهم تعرفوا انو المشمشي/السلمون للبقع الداكنه ، الاخضر للاحمرار والبثور ، البنفسجي لموازنة لون البشره

الكونسيلر { basic }

الكونسيلر هو مسمى ثاني لخافي العيوب .. وهو منتج وظيفته اخفاء وتغطية العيوب .. وهو غير عن اعتقاد الناس مو مخصص لتحت العين بس

الكونسيلر مو محصور استعماله عالهالات .. ممكن استعمالته لتغطية الحبوب ، الكدمات ، اختلاف اللون ، الندوب

وكثير حاجات ،،

السؤال الازلي : افتح مني ؟ اغمق مني ؟ وليش يقلب رمادي ؟

بنخلي اخر سؤال شوي.. بالنسبه للون .. خذي نفس درجتك تماما او افتح بدرجه ،، مو اكثر من كذا

واللي تقول ابغاه ينور لي المنطقه باخذ افتح بكثير .. غلط ! تفتيح حول العين مو بس بالكونسيلر .. فيه منتجات ثانيه بعده

اختبار الدرجه الغلط هي سبب لاسباب انه يبان رمادي

الحين نجي لسؤال ازلي ثاني .. قبل او بعد الفاونديشن ؟

شخصيا احطه بعده .. السبب؟ الفاونديشن يغطي الهالات .. ويمكن لو هالاتك خفيفه يكون كافي بالنسبه لك

بالنسبه لي اشوف ان وضع الكونسيلر قبل هو هدر للمنتج .. بس طبعا الموضوع يرجع لك

السبب اللي خلاني ما احط هالمنتج ضمن فئة ١٥ لأنو غالبا البنات بهالسن هالاتهم خفيفه وما يحتاجو اكثر من الفاونديشن

الباودر { basic - 15 * }

الباودر هي مسحوق ناعم يتوزع بعد الفاونديشن والهدف منها ازالة اللمعان وتثبيت المكياج .. الشي بالباودر انها ممكن تكون صعبه شوي بالاختيار والاستعمال .. عشان كذا كتبت عنها موضوع مفصل تلاقوه ب #powder_leen

النات اللي ١٥ وطالع .. حتحتاجي البودره لو بشرتك دهنيه بس 

البلشر { basic - 15* }

البلشر هو حمرة الخدود .. بودره او سائل او كريم يعطي لون وتورد لبشرتك .. كتبت عنه بالتفصيل الممل ب #blush_leen

اللي ابغى ازيده هنا انو ايش ماكان مكياجك وطلتك .. البلشر بيكمله .. بالبلشر عندنا مات وشيمر .. يعني مطفي او بلمعه

لو كان البلشر بلمعه حيغنيك عن منتج ثاني.. لكن حاليا انصحكم تقروا الموضوع فوق

البرونزر { basic }

البرونزر لو نقدر نقول انه بلشر لونه برونز :$ عشان اوضح الفكره بس .. البرونزر نفس الشي يضفي لون عبشرتك .. وهو غير عن اعتقاد كثير ناس .. انو هو كنتور ،، البرونزر ممكن نستعمله ككنتور صحيح لو درجته مناسبه

لكن البرونزر او لما نقول حطي برونز خفيف .. يعطي دفء لبشرتك ،، وتقدري تعملي لوك اللي شوي متعرضه للشمس

< لو كلامي مو مره واضح سامحوني .. بحاول اوضحه بموضوع منفصل

مين يقدر يستعمل البرونزر ؟ الكل .. لكن بطريقه محدده #bronzer_leen برضو البرونزر يجي بعدة اشكال

يهمني اوضح : انو فيه منه درجات .. البرونز المايل لرمادي او بيج او قريب للون البشره ويكون مات مطفي تماما ،، ممكن يستعمل كونتور

البرونز البرتقالي او المايل للبني .. كبلشر او دفء للوجه

وترا حتى البرونزيات يقدروا يستعملوا برونزر لو اختاروا الدرجه الصح

يهمني تفهوا هالجزئيه صح قبل انتقل للاضاءه والكونتور ()

القاكم على خير