أساسيات المكياج الجزء الأول

❤️ .. يسعد اوقاتكم

كيف حال جميلاتي ؟ بوست طلبتوه كثير .. اساسيات المكياج

موضوع اليوم طويل شوي وبيكون على اجزاء (٣) فجهزوا لكم سناك او شي وانتوا تتابعوا معاي

نقطة بدايه : لو انتي مهتمه بالميك اب ،، او حتى باديه تهتمي ،. لازم تعرفي ميزانيتك

عارفه انو شي غريب اني اقول لكم كذا ،، بس لازم انبهكم .. وخاصة الجميلات الصغار اللي ١٥ وطالع

المكياج عندنا هاي اند ودرق ستور .. اش يعني هالشي ؟ 

Highend يعني الماركات الغاليه .. شانيل وديور ،، بوبي براون ، مارك جيكوب .. هالماركات

Drugstore يعني الماركات ذات الاسعار المتوسطه او الرخيصه تقريبا .. اللي هي زي ريفلون ومايبلين وماكس فاكتور ونكس وكذا

وفي ماركات بالنسبه لي اصنفها بينهم اللي هي ماك وانجلوت

لما تبدين ،، لا تنسحبي ورا الماركات الهاي اند انو فلانه مدحتها وفلانه ناسبتها وكل الناس عندهم .. لازم اشتريها حتى لو ميزانيتي او ميزانية اهلي ما تسمح

هالشي غلط ،، !

مو غلط تحبي المكياج وتشتريه ،، ولا قاعده اقول انو غلط تشتري من هاي اند

كلامي انو اعرفي ميزانيتك وتعايشي معها ،، لا ترهقي اهلك / زوجك / نفسك بشي ما يقدرون عليه

لما تكوني ببدايتك.. حلو تجربي شي ما يخسرك كثير .. بس الين تعرفي اش اللي يناسبك وتتأكدي من قدرتك الماليه

ما اقولك روحي اشتري ماركات سيئه ورخيصه وخربطي بوجهك

ابداً لا ،، هالخربطه بتخليك تندمين لما تأذين بشرتك .. فيه ماركات درق ستور ممتازه لو صح قولي ( اعرف بالقى معارضه عهالكلام) تنافس الهاي اند

فيه اشياء تضطري تشتريها من هاي اند لأنك بشكل يومي تستخدميها وتعرضين بشرتك لها .. زي الفاونديشن والبرايمر كمثال .. هالاشياء مو خساره تدفعين فيها وتكوني استثمرتي فلوسك بشي كويس 

بس كمان بالمعقول

يارب اكون وضحت نقطتي ..

النقطه الثانيه : لو انتي ما تحتاجي مكياج ( بشرتك كويسه او لسا صغيره او لأي سبب ) .. مو لازم تحطي ،. من فتره جتني وحده تقول احنا ليش نقلد الغرب بكل شي ؟ بالمكياج تقصد انو مو لازم نحطه كل يوم ،، صحيح مو لازم نحطه كل يوم بس فيه ناس تحتاجه وناس تحبه .. المكياج غير انه ممكن يغطي عيوب البشره ويحلي الوجه .. المكياج يحسسنا بالرضا عن انفسنا .. لو حطيتي مكياج مو معناها انك - مو حلوه - ولا العكس كمان ، اللي ابغى اوصله المكياج مو اجبار ،، 

حلو البنت تهتم بنفسها وتعتني بها .. لكن باقتناعها ، مو بضغط من اللي حولها 

بس حبيت اوضح هالنقطتين قبل نبدا :$

--------------

-معليش تحملوني.، كلامي كثير وطويل-

عموما يله نبدا .. بتنصيف هالموضوع بتلاقوني اكتب عند كل شي ااتكلم عنه زي كذا

Basic : لازم يكون عندك اش ما كان حالك 

15*: هذا معناه انو هالشي مناسب للبنات اللي بادين يحطوا مكياج اللي عمرهم حول ١٥ سنه

Additional : يعني اضافي . حسب حاجتك وتفضيلك الخاص

حلو ؟ يارب يكون واضح

ببدا حسب ترتيبي انا بوضع المنتجات عوجهي .. 

المرطب { basic  - 15* }

غريب اني اتكلم عن المرطب هنا ؟ يمكن ،بس بالنسبه لي الترطيب خطوه اساسيه بالمكياج ،، لو كان كل شي تسوينه بيرفكت  بس بشرتك جافه ومو متغذيه ،، لا تتوقعين كثير

رطبي بالكريم المناسب لحالة بشرتك .. وهنا نتباين ،، فيه ناس تحب كيو ڤي وناس سيتافيل وناس كلينيك وناس نيفيا ،، وغيرها

الحد الفاصل هنا هو حاجة بشرتك للترطيب وممكن شوي قدرتك ،، اشوف المرطب استثمار كويس لبشرتك وفلوسك

البرايمر { additional }

برضو فيه ناس بتعارضني عالتصنيف هذا .. بس قبل ابدا ابرر .. اش هو البرايمر ؟ هو منتج يهيئ بشرتك لاستقبال الفاونديشن ويخليه يدوم اكثر.. وله استعمالت زي اخفاء المسام تخفيف الاحمرار تقليل الزيوت وغيره .( تكلمنا عنه قبل ) ومنه الوان زي الصوره وقوام ومكونات مختلفه.. 

من تحتاجه ؟ اللي عندها مشاكل مع ثبات الفاونديشن او مسام او شي ،، 

باخصص له موضوع كامل بعدين لو حابين

مبدئيا ، لو عندك مسام وبشرتك مختلطه او دهنيه : انصحك بالبورفيشينال من بينيفت بس رطبي قبله واستعمليه صح.. متوفره كثير انواع من كثير ماركات لكن ما حاقدر اشملها هنا 

الفاونديشن { basic }

كريم الاساس .منتج ملون يساوي البشره ويوحد لونها مؤقتا . دوره بعد الترطيب والبرايمر .. كيف تختاريه ؟ النوع ؟ حسب نوع بشرتك تقدري تشوفي الموضوع عنه قبل .. اللون ؟ هنا يحتار الكل .. افضل نصيحه اقدر اعطيها : اطلبي عينات وجربيها بالبيت الين تحكمي عليها

احدى الجميلات قالت مابي تقولي لنا روج وخلاص،ابي تحددي .. اعتذر منك جميلتي بس ما حاقدر كذا.. الموضوع بيطوول

يندرج تحت الفانديشن ال

BB-CC cream { 15* - additional }

لو انتي لسا صغيره او تبغي شي خفيف وما يضر بشرتك .. انصحك بالبيبي كريمي . هو بالضبط نفس الفاونديشن لكنه اخف ويفيد بشرتك .. لو بشرتك حلوه ( للي عمرهم ١٥ او حولها ) مو لازم تستعملي شي ( هذا رأيي ) البيبي تلاقوه من كثيير ماركات .. زي قارنييه وذا بودي شوب وغيرها

مره ثانيه اسفه انو كلامي طويل ماني قادره الم الموضوع

الجزء الثاني قريبا ان شاء الله