إزالة الشعر : الحلاوة والشمع

السلام عليكم ورحمة الله وبركاته

كيف حالكم ؟ زماان عن المدونه مو صح؟ :$

سألتكم لو حابين اتكلم عن ازالة الشعر وكثار قالوا ايوا

فالموضوع هذا لكم 😘 بس كبداية حابه انبه على شي

 : انا ماني خبيره ولا مختصه بهالامر

كل اللي احاول اسويه اني اكلمكم عن تجاربي واحصر لكم معرفتي بهالمجال

بتلقونني بانواع اسهب واتكلم بتفصيل ، وانواع ثانيه اذكرها باختصار 

حاسهب باللي جربته بنفسي واختصر واخذ منكم باللي ما تسنى لي اجربه بس بغرض ان الموضوع يشمل كل شي

ثاني حاجه حابه اتكلم عنها هي طبيعة الجسم وطبيعة شعر الجسم .. وهالشي يعني لنا كثير بعملية ازالة الشعر

في ناس من ربي شعرها خفيف وسهل ،، مساماتها غير واضحة ، والشعره نفسها تكون مو غامقة فالناس هذي شعرها يزال بسهوله نوعا ما

وفي ناس عالجهة الثانيه شعرهم اسود بقوه ، مساماتهم اوضح شوي . وازالة الشعر بالنسبه لهم مؤلمه ويصاحبها نزف من منابت الشعر

والجماعه اللي بينهم المتوسطين ،، اللي شعرهم مو هذاك الناعم زياده ولا القوي ومساماتهم عاديه ،، هالناس غالبا تناسبهم كل الطرق بالم معقول جدا

فحلو تعرفي انت اول شي اش نوع شعر جسمك وكيف كثافته؟ وعلى اساسه تختارين الطريقة المناسبه

بالاضافه لطبيعة شعر الجسم كمان لازم نراعي طبيعة الجسم نفسه

في ناس جلدها حساس زياده لدرجة اذا شالت بالحلاوة تتكدم ويصير نزف بمنابت الشعر ( هالشي بنفصل فيه اكثر لأن السبب احيانا يكون السبب انك تزيلين بطريقة خطأ )

في ناس تتألم بقوة وعهالاساس ما تقدر تستعمل لا الحلاوه ولا الالة .. ( وبنتكلم عن شوية طرق لتخفيف الالم )

وفي ناس طبيعيين جلدهم عادي مايتحسس بسهوله وحساسيته للالم اصلا معقوله

علموني انتو اي نوع ؟

الطرق اللي ممكن تستعمل لازالة الشعر ؛

الحلاوه والشمع ،الآلة ٫ الحلاقه ، كريمات ازالة الشعر ، الليزر

عشان تمشون معاي وتفهمون ليش انا فضلت هالطرق اقولكم عن جسمي

شعري يعتبر متوسط الى خفيف ، جلدي حساس فبسهوله اتكدم وخاصة يديني

فتقريبا استعمل كل الطرق  ، وعندي هوس بانو المفروض ما يبقى ولا شعره

فاذا شفتوا نزعة واضحة شوي عادي طنشوا 😅

نبدا سوا بالحلاوه؟

انا من لما بديت ازاله وانا استعملها ، كانت تعطيني النتيجه اللي ابغاها ، جلد ناعم وبدون شعر لا فوق ولا تحت الجلد

اش اللي يميز الحلاوه غير تعبها 😅

انك لما تستعملينها تخلصك من طبقة الجلد السطحيه الميته وتزيل الشعره من جذرها بدل ما تقطعها

الشعر بعد استعمال الحلاوه يطول على ما يطلع ويطلع اخف

اكيد يعتمد عسرعة نمو الشعر عندك كمان ،، بس تعطيك اطول فتره مقارنة بالطرق الثانيه

اذا كنتي من الناس اللي يستعملوا الحلاوه باستمرار ما حتعاني من الشعر تحت الجلد ،،

لكن ممكن تعاني من المسامات المتوسعه اذا ما استعملتيها بشكل صحيح او ما اعتنيتي بعدها

كثير ناس يكرهوها عشان وجعها وانا معكم ،، هي مؤلمه وخاصة بالبدايه ،

بس كل اللي يتألموا منها جربتوا تكملون فيها شوي ؟ ترا رجلك او المنطقه اللي تستعملينها عليها تتخدر بعد فتره قصيره وتصيرين تشيلين عادي بدون الم

تاخذ وقت ويبغالها معرفه شوي بس برأيي النتيجه تستاهل

شخصيا استعملها لرجولي الين الركبه ولمنطقة الاندر ارمز(الابطين) ، باقي جسمي مايتحملها ولا تفيده

تسبب لي كدمات ونزف تحت الجلد

طريقة استعمالي لها :

اجهز جلدي باني اقشره وهالشي غالبا يكون قبلها بيوم .. بنات نصحوني وقالوا لي ما ينفع وانك بكذا توسعين مسام الشعر

ما اعرف عن مدى صحتم او صحتي ،، بس باقولكم السبب اللي يخليني اقشر وعلى اساسه قيموا بعقلكم

لفتره كنت استعمل الموس وهالشي يسبب لي نمو للشعر تحت الجلد .. اللي لقيته مع التقشير انو فعلا يفتح المسام بس بطريقه ايجابيه لحالتي

لأنها تخلي الشعر اللي تحت الجلد يطلع ويزال بالحلاوه .. 

اش المقشر اللي استخدمه ؟ اي مقشر جسم جاهز عندي زي كريم كاب وسيتي موريتس 

او لو ماكان متوفر عندي اسوي مقشر من نص كوب سكر وزيت زيتون وعسل وليمون ( الكميه حسب تقديرك )

واستعمله عرجولي مثلا ثم اغسل بصاب،ن عشان ما يبقى اثر للزيت

استعمل الحلاوه وبافصل لكم هنا الانواع والادوات والطريقه

الانواع :

سابقا كنت استعمل حلاوة ميم .. سوريه وممتازه ومنها كثير اشكال احدها الرول لكن مع الاسف انقطعت

الانواع اللي استخدمتها بعدها شهرزاد وكنوز وسندريلا .. كلها تلقونها عند العطارين والبقالات يعني مو شي مميز

والحلاوه بشكل عام سهله ومرنه .. لدرجة ماما ممكن تسويها لي بالبيت لو ماعندي جاهز 

هي مكوناتها ماء وسكر وليمون فعشان كذا بسيطه وما تحسس الجسم

اش افضلل نوع ؟ زي ما بينت هي ما تفرق كثير الا بتفضيلك الشخصي وكسف حسيتيها معاك .. جربي واحكمي

الادوات والاعداد :

جلدك < احلفي يالين هههه

كمية معقوله من الحلاوه .. لا تكبريها ولا تصغريها عشان تقدري تتعاملي معها ..

انا اخذ تقريبا نص ملعقه كبيره 

فوطه رطبه عشان يدينك

واجلسي بغرفه لحالك عشان ترتاحين وخلي درجة الحراره معقوله .. اذا برد مره تصير قاسيه .. واذا حر بتسيح عليك وتحوسك 

تحديد الحراره دقيق شوي .. وجففي جلدك ولا تكوني حاطه كريم ولا شي عشان تلصق معك الحلاوه وما تتعبك

الطريقه :

ابدي ليني قطعة الحلاوه بين يدينك بانك تشديها وتثنيها وتمطيها عبعض ( اول شي بتكون قاسيه بس شوي شوي تطرى )

 ولونها بتلاحظين انه يتغير خلال هالمرحله

-- وانا ابحث لكم عن صور لقيت موضوع كامل وممتاز لشرح العمليه

وحسيت انه بيكون اوضح لكم فهذا الرابط 

http://forums.fatakat.com/thread4238951--

- اكمل لكم طريقتي للي حابين يعرفوا افرد الحلاوه على منطقه صغيره بعكس اتجاه نمو الشعر واشيله بنفس الطريقه

( هنا الموضوع كثير يختلفوا فيه > شخصيا هذا اللي ناسبني واللي اسويه واللي لاحظت انه يشيل لي حتى الشعرات الصغيره )

اكمل كل الرجل او المنطقه اللي اسويها واحاول اني ما اعيد عنفس المكان اكثر من ثلاث مرات وما اصير عنيفه مع جلدي

( لمنطقة تحت الابطين ارش شوي بودرة اطفال قبل النزع عشان الحلاوه تمسك الشعر بس دون الجلد )

بعد ما اخلص عشان اتخلص من الدبق اغسل رجولي بماء بارد وصابون غير معطر او طبي 

(فيه ناس تفضل تدهن بزيت زيتون ونشا ..او ماء ورد ونشا.. وكثير منكم كتبوا لي كذا لكن لسا ما جربت )

لو تهيج جلدي ممكن احط فوسيكورت او فيسدوين او لو مالقيت بس ارطبها بكريم طبي غير معطر مثل سيتافيل وبيبي ونوتراديرم 

جسمي غالبا يجلس متهيج يومين بعد الازاله واتضايق من الماء الساخن والملابس والمعطرات فاتجنبها

وو لو بقت لي شعرات صغيره ممكن اني اشيها بالملقط 

شوية نصايح : 

- لا تزيلي الشر بأي طريقه اثناء الدورة الشهريه .. اول شي بيوجعك وثاني شي بينمو بسرعه هائله

- بالحلاوه كل ما كان الشعر اطول كل ما كان اسهل واسرع بالازاله 

- عشان تخففي الالم ممكن تبردي جلدك بكمادات بارده قبل ازالة الشعر

- لما تمتلي قطعة الحلاوه شعر لا تقولين يله ما بقى لي شي ،، ارميها واستعملي غيرها

حرام توجعين نفسك وهي ما تشيل لك شي

- لا تسوين تقشير ولا حمام مغربي بنفس اليوم بعد الحلاوه ولا تستعملي اي طريقة ازاله ثانيه خلال يومين بعدها عشان ما يتهيج جلدك ويحمر 

- ركزي عركبك وانتي تزيلين الشعر .. استعمال الحلاوه يزيل الجلد السطحي ويخفف السواد مع الاستمرار والعنايه

- اذا بقت كم شعره خلاص لا تعيدين عالمنطقه الين تتكدم .. ممكن تزيلين هالكم شعره بالملقط ويكون اهون عليك

- اعتني بجلدك صح بعدها وان شاء الله ما تواجهين مشاكل ..

بالنسبه للشمع لأنو ماكانت لي تجارب معاه .. باطلب منكم تشاركوني والردود المفيده باضيفها للموضوع

- باقي طرق ازالة الشعر بتنزل خلال هالاسبوع ان شاء الله بس نزلت لكم هالموضوع بدري عاساس انو كثار طلبوه يكون باقرب وقت

يارب يكون افادكم