REVIEW : frank body scrub

السلام عليكم ورحمة الله وبركاته ()

نورتوني ()
اول شي اشكركم على انكم وصلتوني اليوم 90k ويارب اكون قد الثقه ()
شي ثاني اني انوي اخلي هالمدونه مكاني الثابت .. وان شاء الله باشتغل عليها خلال هالصيف

موضوعنا اليوم حسب تصويت الاغلبيه عن مقشرات القهوه من فرانك ..
وقبل ابدا انا اسفه بشده اني تأخرت فيه .. اعرف اني من زمان واعدتكم فيه ٫ وكونت رأيي عنه لكن ما اسعفني الوقت اكتبه

نبدا سوا نتعرف على مقشرات فرانك ؟ ( وباستعمل صور لازمني لأني مجهزتها قبل () )

فرانك هي شركة استرالية الصنع والمنشأ ..   الى فتره قريبه كانت تبيع مقشرات حبوب القهوه فقط ثم اضافت الكريم المرطب والآن تتوسع اكثر وقررت تبدا خط عنايه بالبشره قائم على القهوة

اللي يهمنا اليوم بشكل اساسي مقشرات فرانك ..

هي مقشرات مصنوعه من حبيبات القهوه الطبيعية بالاضافة لعدة زيوت مغذيه ٫ منها حالياً ٤ أنواع تتشابه بالمفعول وتختلف اختلاف طفيف بنوع البشره والمشكله اللي تستهدفها

لكن بشكل عام كلها حسب الموقع تفيد مع التالي :  

الجلد الجاف - علامات التمدد ( الاسترتش ماركس) السيليوليت - الاكزيما - الصدفية وعروق الدوالي والندبات والاثار
كلها تجي بكيس حجمه ٢٠٠ غم مقاوم للماء وله سحاب يقفله من فوق لحفظه

خلونا نستعرض الانواع سوا ..

نبدا مع مقشر فرانك الاصلي original frank body scrub :

 

اول نوع انتجته الشركة وهو اللي جلب لها الشهره ، مكوناته الاساسية : حبوب القهوه المطحونه - زيت اللوز الحلو - ملح البحر - فيتامين E -السكر البني - زيت البرتقال

الشي اللي يخلي ريحته برتقال وبرضو الشي اللي منعني اجربه

مقشر فرانك بجوز الهند وبذور العنب frank cocnut & gapeseed coffeee scrub

مكوناته الاساسية:  حبوب القهوه المطحونه - زيت بذور العنب -  زيت جوز الهند- زيت الجوجوبا

ريحته باونتي بالنسبه لي :$

هالنوع يناسب البشرات الحساسه وهو اللي جربته وباذكر تجربتي معه بآخر التدوينه

مقشر فرانك بالكاكاو frank Cacao coffeee scrub

مكوناته الاساسية:  حبوب القهوه المطحونه -خلاصة الكاكاو العضويه -  زيت المكاديميا- زيت الجوجوبا

يناسب البشره المجهده والمرهقه وريحته شوكولاته

واخر نوع اطلقوه بالنعناع PEPPERMINT BODY SCRUB

مكوناته الاساسية:  حبوب القهوه المطحونه والخضراء  -زيت النعناع -  زيت الزيتون - خلاصة الصبار

ورائحته حلاو نعناع

أي نوع اختار ؟ بشكل كبير يعتمد عليك وعتفضيلك للروائح .. لأن معظمها نفس الغرض

كيف استخدمه وكم مره ؟ اكثر سؤال جاني بلازمني وبحسابي .. 

يستعمل حسب الموقع من ٣-٥ مرات اسبوعيا ..

طريقة الاستخدام ؟

- خذي ملاة يدك بصحن او علبه جانبيه عشان ما تدخلي يدك الرطبه جوا الكيس ( تقريبا انا استخدم ملاة يدي وملعقه فوقها لجسمي كامل ووجهي )

- بللي جسمك وكأنك بتتروشي عادي ثم ابدي وزعي المقشر على جسمك .. هالمقشر عباره عن حبوب قهوه فبيحوسك معاه

بعد تجربه وبحث لثيت احسن شي انك تطبطي فيه وما تكثري ثم تبدي توزعيه بحركات دائريه على جسمك

( للامانه قريت هالشي برفيو احد البلوقرز بس ماني قادره افتكر مين ) 

- مسجي المقشر على جسمك بحركات دائريه لتنشيط الحركه الدمويه وركزي عالاماكن اللي تبين تستهدفيها

مثلا لو عندك ندبه او اثر تبغين تجربين فرانك عليه

- اتركي المقشر على جسمك ل ٥-١٠ دقايق الين يمتصه جسمك الفائده منه ثم اشطفيه تماما

- لو بشرتك جافه تقدري تكتفي وما تستخدمي شور جل بعده .. لو دهنيه او مختلطه اغسلي جسمك وبشرتك بغشول ملائم عشان تتخلصي من الزيت

تجربتي معه :

جاني من متجرdeeplyshopping لتجربته منذ مده .. واستعملته كذا مره لكن كنت اكرهه لعناءَه ،، بعد كل استخدام تحتاجي تنظفي الحمام بقوه لأنه مره يوسخ وهالشي خلاني اتأخر بالحكم عليه

بالنسبه لمفعوله .. هل فعلا يسوي اللي يعد فيه ؟ بالنسبه لي ما لاحظت له اثر عالتشققات والخطوط لكن نفعني كثيييير بالجفاف وو كان عندي بقعه صغيره بساقي اكزيما وجددا خففها وما عادت تضايقني .. جسمي بعده مترطب بشكل جميييل لدرجة اني ما احتاج  ارطب بعده

المقشر فعلا يقشر وتحسين فيه .. مو مثل مقشرات استخدمتها من سوب اند قلوري اللي تحسوها للدلع .. هذا فعلا يعطي مفعول

حبييييت مفعوله عالوجه وندمت اني ما جربته الا بآخر استخدامين لوجهي .. ما اعرف كيف اوصفلكم مفعوله لكن بجد حبيته ( بس البنات ذوات البشره الحساسه لازم ينتبهوا ويجربوه عبقعه صغيره اول لأنه قوي )
بالنسبه للي للوجه والجسم كنت استخدم بعده غسول لأني ما اتحمل شعور الزيت على جلدي

كمان  نفعني شوي بمشكلة الشعر اللي ينمو تحت الجلد لكن كنت استعمل كذا شي فما اقدر اجزم انه لوحده كان السبب

اللي ما حبيته فيه غير انه يوسخ كثير: .. ريحته ! تمسك بشكل قوي جدا ولو تبين تنامين تأكدي القهوه ما حتخليك

بالنهايه :

حبيته ؟ ايوا وبشده ومتضايقه ان باقي بحقي استعمال واحد

بارجع اشتريه ؟ اعتقد ايوا .. حبيت بشرتي وتفاعله معها بس اظن باجرب الكاكاو

انصحكم تجربوه ؟ مو للامال اللي يعد فيها كلها لا . ولا تتوقعوا منه كل الاشياء الرهيبه اللي سمعناها

لكنه مقشر قوي ويستحق التجربه برأيي

مكان الشراء : يوفرونه التاجرات بالانستقرام 

اللي استعملته وصلني من : deeplyshopping

وبرضو اوفره بلازمني : @lazmni

سعره يتراوح بين ١٠٠-١٥٠ / حسب كل تاجره

وووبس .. اتمنى اكون غطيت كل شي

لو عندكم استفسارات اكثر عنه اتركوها لي بالتعليقات وبارجع واجاوبها

دمتم بخير ()